2025-yil 28-noyabr kuni Nizomiy nomidagi O‘zbekiston milliy pedagogika institutida O‘zbekiston Fanlar akademiyasining haqiqiy a’zosi (akademik), Abu Rayhon Beruniy nomidagi Sharqshunoslik instituti bosh ilmiy xodimi, tarix fanlari doktori, professor Dilorom Yusupova bilan uchrashuv bo‘lib o‘tdi.

Tadbir davomida sharqshunoslik va manbashunoslik sohalarining dolzarb masalalari, zamonaviy ilmiy tadqiqotlardagi yangicha yondashuvlar, xorijiy tadqiqotchilar bilan hamkorlik aloqalari haqida fikr almashildi.

Shuningdek, professor-o‘qituvchilar, talabalar va tadqiqotchilar tomonidan bildirilgan savollarga batafsil javoblar berildi.

2025-yil 13–16-noyabr kunlari O‘zbekiston Respublikasi Fanlar akademiyasi Abu Rayhon Beruniy nomidagi Sharqshunoslik instituti “Tarixiy manbashunoslik” bo‘limi kichik ilmiy xodimi Idiyev Akbar Avaz o‘g‘li Xitoy Xalq Respublikasining Sian shahrida bo‘lib o‘tgan “Шанхайский дух и сила молодежного действия” nomli xalqaro ilmiy-amaliy konferensiyada ma’ruzachi mehmon sifatida ishtirok etdi.

Mazkur konferensiya Shanxay hamkorlik tashkilotiga a’zo davlat rahbarlarining 25-sonli majlisida ilgari surilgan takliflar ijrosini ta’minlash doirasida Xitoy Ijtimoiy fanlar akademiyasining Rossiya, Sharqiy Yevropa va Markaziy Osiyo tadqiqotlari instituti hamda Shimoliy-G‘arbiy politexnik universiteti hamkorligida tashkil etildi.

A.A. Idiyev konferensiyaning birinchi sho‘basida “Abu Rayhon Beruniy asarlarida Xitoy tavsifi” mavzusida ma’ruza qildi. Unda Beruniy qalamiga mansub manbalarda Xitoy shaharlari, madaniyati va ilmiy-merosiga oid ma’lumotlar tarixiy-manbashunoslik nuqtai nazaridan tahlil etildi.

O‘zbekiston Fanlar akademiyasi Sharqshunoslik instituti Abu Rayhon Beruniy nomi bilan atalgan bo‘lib, allomaning asarlari institutda tarjimalar va nashrlar orqali izchil o‘rganib kelinmoqda. Zamonaviy talablarga mos ravishda institutda Beruniy merosini raqamlashtirish va jahon ilmiy jamoatchiligi uchun ochiq elektron dasturini yaratish bo‘yicha amaliy loyiha amalga oshirildi.

Loyiha doirasida Buyuk Britaniya, Germaniya, Niderlandiya, Turkiya, Fransiya, Eron va Hindiston kabi mamlakatlarda saqlanayotgan qo‘lyozmalarning elektron nusxalari to‘planib, ularning ingliz tilidagi ilmiy tavsiflari bilan birga http://heritageof.beruni.uz/ saytiga joylashtirildi. Portal 43 ta asarga oid 172 qo‘lyozmaning 12 bandlik ilmiy tasnifini, shuningdek Beruniy hayoti va sayt haqidagi maʼlumotlarni o‘z ichiga oladi.

Shu asosda institut qo‘lyozmalar fondida maxsus raqamli Beruniy kolleksiyasi shakllantirildi. Kelgusida Rossiya va arab mamlakatlarida saqlanayotgan qo‘lyozmalarni ham qamrab olish rejalashtirilgan.

Ushbu ishlar yuzasidan institut direktori, professor Bahrom Abduhalimovning “Scientific heritage in a digital format” maqolasi The UNESCO Courier jurnalida chop etildi (November 2025, pp. 12–13).

O'zbekiston Respublikasi Fanlar akademiyasi Abu Rayhon Beruniy nomidagi Sharqshunoslik institutida 19-noyabr kuni "Qo'qon adabiy muhiti manbalariga oid tadqiqotlar va muammolar" mavzusidagi xalqaro seminar bo'lib o'tadi. Barcha tadqiqotchilarni ishtirok etishga taklif qilamiz. Seminar oflayn va onlayn formatda o'tkaziladi.

Masofadan qatnashuvchilar uchun Zoom ilovasi: https://us06web.zoom.us/j/8254776667?pwd=WVMxNjRVenhYZmFWY3l4OTUvU1lVdz09&omn=83207640426

Manzil: Toshkent shahri, Mirzo Ulug'bek ko'chasi, 79